Færslur: 2011 Ágúst

29.08.2011 09:39

Skráningarfrestur á Borgarnesmót að renna út

Skráningarfrestur vegna frjálsíþróttamóts UMSB fyrir 15 ára og yngri, sem fram fer á Skallagrímsvelli laugardaginn 3. september nk. rennur út annað kvöld, þriðjudagskvöldið 30. ágúst, kl. 20:00. Allir sem eru áhugasamir um að taka þátt í mótinu geta haft samband við framkvæmdastjóra HSS í netfangið tomstundafulltrui@strandabyggd.is eða í s. 894-1941 og hann skráir keppendur á mótið.

Allar nánari upplýsingar má nálgast með því að smella hér.
 

27.08.2011 09:18

Gamlar fréttir og myndir

HSS vat stofnað árið 1944. Á þeim tæpu sjötíu árum sem liðin eru frá stofnun sambandsins hefur margt á daga þess drifið. Í vetur verða við og við birtar hér á HSS-vefnum gamlar myndir og fréttir úr starfi félagsins. Gaman væri að fá viðbrögð frá lesendum vefsins - hvort þeir muni eftir atburðinum sem verið er að flytja fréttir af eða hvort þeir þekki fólk á myndum.

Við byrjum á frétt sem birtist fyrst í Vísi þann 4. okt. 1977. Þar kepptu Strandamenn við illa klædda Blika á ónýtum malarvelli, töpuðu 6-1, heiðruðu Gulla Bjarna og misstu Magnus Hansson af velli með beint rautt spjald eftir að hann talaði við samherja!

Smellið á fréttina til að stækka hana!


 

26.08.2011 11:57

Göngum í skólann



Líkt og undanfarin ár er ÍSÍ í forsvari fyrir hvatningarátakið Göngum í skólann. Að þessu sinni hefst það með setningu miðvikudaginn 7. september og lýkur formlega með alþjóðlega Göngum í skólann deginum miðvikudaginn 5. október.

Að þessu sinni er verið að halda verkefnið í fimmta sinn hér á landi. Sem fyrr verður lögð áhersla á að börn gangi eða hjóli til og frá skóla. Markmið verkefnisins eru að hvetja til aukinnar hreyfingar með því að auka færni barna til að ganga á öruggan hátt í skólann og fræða þau um ávinning reglulegrar hreyfingar.

Á síðasta ári tóku milljónir barna frá 40 löndum víðs vegar um heiminn þátt með einum eða öðrum hætti í alþjóðlega verkefninu Göngum í skólann. Þátttökumet var slegið hér á landi með þáttöku 52 skóla um allt land. 

Samstarfsaðilar eru mennta- og menningarmálaráðuneyti, Umferðarstofa, Landlæknisembættið, Heimili og skóli - landssamtök foreldra, Slysavarnafélagið Landsbjörg og Ríkislögreglustjórinn.
 
Skráningarfrestur er til 1. september en allar nánari upplýsingar er að finna á heimasíðunni www.gongumiskolann.is.
 

23.08.2011 14:02

Frjálsíþróttamót á Akureyri og í Borgarnesi

Meistaramót Íslands 15-22 ára í frjálsum íþróttum fer fram á Akureyri um næstu helgi. Aðilar innan HSS sem hafa hug á að skrá sig geta haft samband við framkvæmdastjóra í netfangið tomstundafulltrui@strandabyggd.is eða í s. 894-1941. Fyrir liggur að íþróttamaður ársins hjá HSS árið 2010, Hadda Borg Björnsdóttir, mun keppa í hástökki í flokki stúlkna 18-19 ára. Hægt er að skoða tímaseðil og aðrar upplýsingar um Meistaramótið með því að smella hér.

Þá er rétt að minna á fjölþrautarmót UMSB sem fram fer á Skallagrímsvelli laugardaginn 3. september nk. Mótið er ætlað keppendum fæddum 1996 og síðar (15 ára og yngri) og þátttökugjald er kr. 1.500.- Nálgast má allar upplýsingar um mótið með því að smella hér.
 

23.08.2011 09:19

Harpa í þriðja sæti á Bikarkeppni FRÍ

Harpa Óskarsdóttir í Umf. Neista á Drangsnesi keppti í spjótkasti í Bikarkeppni FRÍ 15 ára og yngri sem fram fór í Kaplakrika síðasta sunnudag. Hún keppti fyrir lið Vesturlands og stóð sig með prýði. Lengsta kastið var 32,52 m. sem dugði henni í þriðja sæti, en flestir keppendur í spjótinu voru einu eða tveimur árum eldri en Harpa sem er 13 ára gömul.

Þeir sem luma á fréttum af afrekum íþróttafólks af Ströndum eða innan raða HSS er vinsamlegast bent á að láta framkvæmdastjóra vita í netfangið tomstundafulltrui@strandabyggd.is! Það er mikilvægt að miðla fréttum af fólkinu okkar :)
 

22.08.2011 11:13

Barnamótið á Drangsnesi tókst afar vel

 


Barnamót HSS í frjálsum íþróttum fór fram á Drangsnesvelli á sunnudaginn. Ágætis þátttaka var í mótinu, en um þrjátíu krakkar spreyttu sig á hinum ýmsu íþróttagreinum í einmuna veðurblíðu. Eftir mótið gæddu keppendur og gestir sér á pylsum og drykkjum í boði KSH, grilluðum af meistarakokkum Ungmennafélagsins Neista í Kaldrananeshreppi sem stóðu einnig í ströngu við undirbúning mótsins ásamt HSS. Allir þátttakendur í mótinu stóðu sig með prýði og fengu afhenta verðlaunapeninga strax eftir mót.
 
Við sama tækifæri var liðsmönnum úr Umf. Geisla afhentur bikar vegna sigurs félagsins í stigakeppni Héraðsmótsins sem haldið var á Sævangsvelli 23. júlí. Við þökkum þátttakendum og gestum kærlega fyrir og hlökkum til að sjá enn fleiri keppendur á Barnamótinu árið 2012!

Öll úrslit í mótinu eru komin inn á mótaforrit FRÍ - þau má sjá með því að smella hér.
 









 
 

19.08.2011 12:57

KSH styður höfðinglega við Barnamót HSS



Það er HSS mikilvægt að eiga góðvini heima í héraði sem sjá sér fært að styðja við bakið á starfsemi sambandsins. Í gegnum tíðina hafa t.d. sveitarfélögin á Ströndum stutt vel við starfsemina auk annarra fyrirtækja á svæðinu.

Það er afar ánægjulegt að skýra frá því að Kaupfélag Steingrímsfjarðar ætlar að styðja við Barnamótið sem verður á sunnudaginn á höfðinglegan hátt með veitingum eftir mót. Héraðssambandið kann KSH sínar bestu þakkir fyrir stuðninginn og hvetur fólk að sjálfsögðu til að versla í heimabyggð við þá samfélagsstoð sem Kaupfélagið sannarlega er!

Einnig er minnt á skráningu á Barnamótið á sunnudag - hún er í fullum gangi og fer fram í gegnum netfangið tomstundafulltrui@strandabyggd.is. Skráningu lýkur á hádegi laugardaginn 20. ágúst.
 

19.08.2011 09:13

Skráningarfrestur til hádegis á morgun

Nú eru skráningar fyrir Barnamótið á Drangsnesi þann 21. ágúst byrjaðar að detta inn. Fólk er hvatt til að skrá sig tímanlega, helst fyrir kl. 12:00 á hádegi á morgun, laugardaginn 20. ágúst.

Skráningar fara fram í gegnum netfangið tomstundafulltrui@strandabyggd.is - ekki missa af Barnamótinu!
 

16.08.2011 09:24

Barnamót HSS sunnudaginn 21. ágúst

Barnamót HSS verður haldið á Drangsnesi sunnudaginn 21. ágúst næstkomandi. Mótið hefst kl. 14:00. Tímaseðil mótsins má sjá með því að smella hér, en keppnisgreinar eru eftirfarandi:
   
Börn 8 ára og yngri: 60 m. hlaup, boltakast og langstökk
Börn 9-10 ára: 60 m. hlaup, boltakast og langstökk
Börn 11-12 ára: 60 m. hlaup, kúluvarp, spjótkast, langstökk og hástökk
 
Framkvæmdastjóri HSS tekur á móti skráningum á mótið, en einungis verður tekið við skráningum í netfangið tomstundafulltrui@strandabyggd.is. Skrá þarf þátttöku fyrir kl. 12:00 á hádegi laugardaginn 20. ágúst.
 
Eftir mótið ætlum við síðan að gera okkur glaðan dag saman á Drangsnesi með því að fíra upp í grillinu - allir fá pylsur, drykk og tilheyrandi meðlæti!
 
Fjölmennum nú öll á Barnamótið á Drangsnesi og hvetjum krakkana okkar til dáða!


 

16.08.2011 09:02

Harpa Óskars gerir það gott



Harpa Óskarsdóttir í Umf. Neista á Drangsnesi er heldur betur að gera það gott þessar vikurnar. Eins og fram hefur komið hér á vefnum varð hún Unglingalandsmótsmeistari í spjótkasti 13 ára stúlkna á Egilsstöðum um verslunarmannahelgina, en þá kastaði hún spjótinu 31,74 metra.

Viku síðar keppti Harpa síðan á Gaflaranum, stóru frjálsíþróttamóti sem fram fór í Kaplakrika í Hafnarfirði. Þar bætti hún árangur sinn frá landsmótinu svo um munaði og kastaði spjótinu hvorki meira né minna en 34,80 metra, rúmum ellefu metrum lengra en næsta stúlka og náði fyrsta sætinu næsta auðveldlega. Frábær árangur. Á sama móti varð Harpa í 3. sæti í kúluvarpi í flokki 13 ára með kast upp á 9,74 metra.
 
Hörpu hefur í framhaldi af þessu verið boðið að keppa í spjótkasti Bikarkeppni FRÍ 15 ára og yngri sem fram fer um næstu helgi, sunnudaginn 21. júlí. Við óskum Hörpu til hamingju með árangurinn og hvetjum hana til dáða og enn frekari afreka í komandi keppnum!
 

15.08.2011 11:52

Öll úrslit Héraðsmóts komin á netið




Nú eru úrslit úr öllum greinum Héraðsmóts HSS sem fram fór á Sævangsvelli laugardaginn 23. júlí sl. komin inn á netið. Úrslitin er að finna á mótasíðu Frjálsíþróttasambands Íslands, www.fri.is, en einnig er hægt að smella hér til að komast beint inn á úrslitasíðuna.

Þeir sem vilja ná sér í pdf-útgáfu með úrslitunum geta nálgast hana með því að smella hér.
 

15.08.2011 09:14

Boð á fjölþraut í Borgarnesi

Frjálsíþróttadeild Skallagríms hefur boðið okkur til fjölþrautamóts á Skallagrímsvelli laugardaginn 3. september 2011 klukkan 12.00. Með þessu vilja SKallagrímsmenn auka fjölbreytni fyrir yngra frjálsíþróttafólkið og stuðla að meiri fjölhæfni.
 
Keppnisstaður:
Skallagrímsvöllur í Borgarnesi.
 

Tímasetning:
Mótið hefst kl. 12:00 laugardaginn 3. september.


Skráningar:
Keppendur skrái sig í mótaforriti FRÍ fyrir kl. 20.00 þriðjudaginn 30. ágúst.
 

Þátttökugjald:
Þátttökugjald er 1.500 kr fyrir hvern keppenda og greiðist við skráningu inn á reikning Frjálsíþróttadeildar Skallagríms 0354 26 003270, kt. 590593 2229. Staðfesting á greiðslu sendist með tölvupósti til bjarnit@menntaborg.is. Athugið að kennitala verður að fylgja með.
 

Keppnisgreinar:

Fjórþraut

Piltar og stúlkur 11 ára og yngri f. 2000 og síðar:
60 m hlaup, langstökk, kúluvarp, 400 m hlaup.
 
Piltar og stúlkur 12 ára f. 1999: 
60 m hlaup, langstökk, kúluvarp, 400 m hlaup.
 
Piltar og stúlkur 13 ára f. 1998: 
60 m hlaup, langstökk, kúluvarp, 400 m hlaup.
 
Fimmþraut
 
Piltar og stúlkur 14 ára f. 1997: 
80 m grind., kúluvarp, hástökk, spjótkast, 400 m hlaup.
 
Piltar og stúlkur 15 ára f. 1996: 
80 m grind., kúluvarp, hástökk, spjótkast, 400 m hlaup.
 
Stig verða reiknuð  eftir unglingastigatöflu FRÍ.
 
 
Tímaseðill: 
Tímaseðil má finna í mótaforriti FRÍ þegar nær dregur.
 
 
Frekari upplýsingar:
Ingimundur Ingimundarson ingiming@mmedia.is, GSM 898 1851.
 
  • 1
Flettingar í dag: 11
Gestir í dag: 7
Flettingar í gær: 20
Gestir í gær: 15
Samtals flettingar: 375341
Samtals gestir: 73633
Tölur uppfærðar: 20.10.2017 06:40:12