Rækjuvinnslan Hólmadrangur styrkti mótið veglega auk Vífilfells sem gaf drykki. Héraðssambandið bauð öllum keppendum upp á pizzuveislu eftir þátttöku og allir þáttakendur fengu verðlaunapening fyrir góða frammistöðu.

 

Námskeið í Felix, félagakerfi ÍSÍ og UMFÍ, verður haldið á Hólmavík miðvikudaginn 16. nóvember nk. Námskeiðið fer fram í húsnæði Hólmadrangs og hefst kl. 19:00. Öll íþróttafélög á starfssvæði HSS eru hvött til að senda a.m.k. einn fulltrúa á námskeiðið, enda eru skráningar í Felix og þekking á kerfinu mjög mikilvægar hverju ungmenna- og íþróttafélagi.

 

 

Sameiginlegt sundmót UDN og HSS verður haldið í Grettislaug á Reykhólum þriðjudaginn 18. október nk. Mótið hefst kl. 17:00 og eru allir boðnir hjartanlega velkomnir. Þeta er tilvalið tækifæri fyrir krakkana okkar (og alla þá fullorðnu líka) til að sýna hvað í þeim býr, en sundkennsla hefur verið í gangi í nokkrum grunnskólanna á starfssvæði HSS undanfarnar vikur. Menn ættu því að vera í góðu formi.

Umf. Afturelding í Reykhólahreppi verður með pylsur og svala til sölu og því er um að gera að smella sér yfir nýja veginn okkar, keppa í sundi og eiga góðan dag.

Skráning fer fram í síma 690-3825 (Herdís). Vinsamlegast skráið ykkur tímanlega!

Greinarnar á mótinu eru eftirfarandi:

 

8 ára og yngri  - 25 m bringusund og 25 skriðsund

 

9-10 ára - 25 m bringusund,  25 m baksund og 25 m skriðsund

 

11- 12 ára  - 50 m bringusund, 25 m baksund, 50 m skriðsund og 25 m flugsund

 

13-14 ára - 50 m bringusund, 50 m baksund, 100 m bringusund, 50 m skriðsund og 25 m flugsund

 

15-16 ára - 50 m bringusund, 50 m baksund, 200 m bringusund, 50 m skriðsund og 25 m flugsund

 

17 ára og eldri - 50 m bringusund, 50 m baksund, 200 m bringusund og 50 m skriðsund

 

100 m fjórsund (4x25m) flugsund, baksund, bringusund og skriðsund

 

4x50 m boðsund
 
 

Það er ekki á hverjum degi sem Strandamenn verða Íslandsmeistarar í sinni íþróttagrein. Um helgina vann Guðjón Hraunberg Björnsson, Íþróttafélaginu Ívari á Ísafirði og nágrenni, til gullverðlauna í einstaklingskeppni á Íslandsmóti Íþróttasambands fatlaðra í boccia sem fram fór í Vestmannaeyjum um helgina. Alls mættu 220 keppendur til leiks. Keppt var í sjö deildum þar sem keppendur eiga möguleika á að vinna sig upp um deild en Guðjón keppti í 4. deild. Auk deildarkeppninnar voru sérflokkar fyrir mikið hreyfihamlaða keppendur. Íþróttafélagið Ívar sendi tíu keppendur á mótið og gekk þeim flestum vel, þótt Guðjón hafi verið sá eini sem komst í úrslit. 



Aðstaða til keppni þótti mjög góð en keppt var á 18 völlum í íþróttamiðstöðinni í Vestmannaeyjum. Framkvæmd og skipulag mótsins var til fyrirmyndar og íþróttafélagið Ægir fékk jákvæð viðbrögð við ósk um aðstoð heimamanna vegna dómgæslu á mótinu. Markmiðið með að halda Íslandsmót í heimabyggð aðildarfélaga ÍF er að vekja athygli á starfsemi félaganna á hverjum stað og gildi þess að aðgengi fyrir alla sé tryggt.

Frétt og mynd eru af bb.is.
 

Í sjónvarpsþættinum Landanum sem sýndur var í Ríkissjónvarpinu á sunnudaginn var rætt við unga og sprellfjöruga iðkendur í Mótorkrossfélagi Geislans sem hefur aðsetur sitt á mótorkrossbrautinni rétt utan við Hólmavík. Mikil vinna hefur verið lögð í uppbyggingu brautarinnar undanfarin ár, en hún ber nafnið Skeljavíkurbraut og er lögleg 1.400 metra löng keppnis- og æfingabraut fyrir fyrir minni hjól eða fyrir hjól með allt að 85cc tvígengis- eða 125 fjórgengisvélum.

 

Unga fólkið okkar kom að vanda vel fyrir í þættinum og var íþróttamenningunni á Ströndum til mikils sóma.

 

Hægt er að horfa á umfjöllunina með því að smella hér.
 

Við lok Hamingjuhlaupsins 2011 - ljósm. Gunnlaugur Júlíusson
 
Hlaupa- og göngumenningin á Ströndum er í miklum blóma um þessar mundir. Ef vel er að gáð má sjá skokkara, göngufólk og maraþonhlaupara víða þessi misserin, enda kjöraðstæður á Ströndum til hlaupa; falleg náttúra, hreint loft og tiltölulega fáfarnir vegir og slóðar sem henta vel til æfinga. Nokkrir vaskir hlauparar frá Hólmavík hafa tekið þátt í hlaupum á Suðvesturhorni landsins undanfarin misseri.

Í Reykjavíkurmaraþoninu sem fram fór þann 20. ágúst hljóp Kristinn Schram á Hólmavík heilt maraþon á tímanum 4:08:52 og var í 283. sæti af 446 þátttakendum í karlaflokki. Hólmvíkingurinn Rósmundur Númason keppti í hálfmaraþoni og lauk keppni á tímanum 2:14:11. Þá hljóp Ingibjörg Emilsdóttir á Hólmavík 10 km. á tímanum 1:00:25. Sá árangur tryggði henni sæti 805 af 2322 keppendum.

 

Strandamaðurinn Stefán Gíslason hljóp sitt níunda heila maraþon í Reykjavíkurmaraþoninu. Hann lauk keppni á tímanum 3:20:21 og var í 55. sæti í karlaflokki, en þátttakendur þar voru 446 talsins. Stefán hefur að vanda verið afar iðinn við kolann í sumar og hlaupið víða um land. Hægt er að fræðast nánar um hlaup Stefáns á bloggsíðu hans, http://stefangisla.wordpress.com.

Nokkrir brottfluttir Hólmvíkingar tóku einnig þátt og náðu afbragðs árangri. Kolbrún Unnarsdóttir hljóp hálft maraþon á 2:13:38 klst, og í 10 km hlupu m.a. Helena Jónsdóttir á 52:29 mín. og Guðný Guðmundsdóttir á 1:13:48. Tími Helenu dugði henni í 123. sæti sem verður að teljast mjög góður árangur.

Keflvískir Strandamenn gerðu síðan víðreist þann 3. september, en þá fór Reykjanesmaraþonið fram. Þar hljóp Ingibjörg Emilsdóttir 10 km. og bætti hún tíma sinn úr Reykjavíkurmaraþoninu um tæpar þrjár mínútur, hljóp á 57 mínútum og 35 sekúndum. Inga varð í 14. sæti af 33 keppendum í kvennaflokki. Marsibil Freymóðsdóttir hljóp 10 km. á tímanum 1:10:08 og lenti í 29. sæti, en þetta var í fyrsta skipti sem Marsibil tekur þátt í svo löngu hlaupi. Kolbeinn Skagfjörð Jósteinsson keppti í 10 km. karla og hljóp á 56 mínútum og 6 sekúndum sem dugði honum í 21. sæti.

 

Hér með eru Strandamenn hvattir til að taka fram strigaskóna og skella sér út að ganga, skokka og hlaupa!

HSS-vefurinn vill gjarnan fá sendar fréttir eða ábendingar af iðkun eða afrekum Strandamanna á íþróttasviðinu. Senda má ábendingar í netfangið tomstundafulltrui@strandabyggd.is.

 

Keppendur á Firmamóti Skíðafélagsins 2011 - ljósm. http://mundipals.123.is.

Skíðafélag Strandamanna er geysiöflugt íþróttafélag. Starfsemi þess í vetur er þegar hafin, en undanfarna sunnudaga hafa félagar hist einu sinni í viku á nýmalbikuðu plani milli Hólmadrangs og Hleinar á Hólmavík og æft þar á hjóla- eða línuskautum.

Uppskeruhátíð félagsins fyrir árið 2011 haldin í lok ágúst. Þá gerðu menn sér góðan dag, grilluðu lambalæri af Ströndum og heiðruðu þá sem stóðu sig vel á síðasta starfsári. Afhentar voru viðurkenningar fyrir ástundun og framfarir á síðasta keppnistímabili. Einnig voru afhent verðlaun fyrir fjögur skíðamót sem haldin voru síðastliðinn vetur. Fjögur ungmenni fengu bikar fyrir góða ástundun en það voru þau Númi Leó Rósmundsson, Branddís Ösp Ragnarsdóttir, Stefán Snær Ragnarsson og Hilmar Tryggvi Kristjánsson. Hilmar Tryggvi fékk einnig bikar fyrir framfarir síðastliðinn vetur.
 
Síðast en alls ekki síst má nefna að skíðamaður ársins hjá félaginu var kosin Harpa Óskarsdóttir, en hún stóð sig frábærlega og sigraði t.d. bæði í göngu með hefðbundinni aðferð og frjálsri aðferð á Andrésar-andarleikunum á Akureyri.

 

Hægt er að fylgjast með starfsemi Skíðafélagsins á vefsíðu þess, http://sfstranda.blogcentral.is. 
 
 

Vetraropnun í Íþróttamiðstöðinni á Hólmavík tók gildi 1. september s.l. eins og sjá mér hér.

 

Sú breyting verður á opnunartíma sundlaugarinnar þessa fyrstu góðviðrisdaga í haust meðan sundkennsla fer fram fyrir nemendur í Grunnskólanum á Hólmavík, að opið verður fyrir almenning í hádeginu mánudaga - fimmtudaga milli kl. 12:00 - 13:00 og eftir kl. 14:00.

Frétt tekin af www.strandabyggd.is.
 

ÍSÍ býður upp á fjarnám í þjálfaramenntun 1. og 2. stigs á haustönn 2011. 

Fjarnám 1. stigs hefst 26. september og er skráningarfrestur til fimmtudagsins 22. september.  Námið gildir jafnt fyrir allar íþróttagreinar og er öllum opið sem lokið hafa grunnskólaprófi.  Þátttökugjald er kr. 24.000.- og eru þá öll námskeiðsgögn innifalin.  Námið jafngildir ÍÞF 1024 í framhaldsskólum og er metið í báðar áttir milli skólakerfisins og ÍSÍ.

Fjarnám 2. stigs hefst 3. október og er skráningarfrestur til 29. september.  Námið gildir, eins og nám á 1. stigi, jafnt fyrir allar íþróttagreinar og er opið öllum sem lokið hafa námi á 1. stigi almenns hluta eða sambærilegu námi s.s. Íþr 1024 í framhaldsskóla.  Þátttakendur þurfa einnig að hafa 6 mánaða starfsreynslu sem þjálfarar og að hafa lokið skyndihjálparprófi.

Allar frekari upplýsingar um þjálfaramenntun ÍSÍ og fjarnámið gefur sviðsstjóri Þróunar- og fræðslusviðs ÍSÍ á vidar@isi.is eða í síma 460-1467.

Frétt tekin af vef ÍSÍ, www.isi.is.