Nú er heimsókn USVH til okkar lokið og gengu æfingarnar vel fyrir sig. Reyndar slasaðist einn lítilsháttar en verður vonandi búinn að ná sér á næstu helgi.  Eins og alltaf getum við verið stolt af framkomu barnanna okkar.  Og viljum við þakka starfsmönnum Íþróttamiðstöðvar Hólmavíkur kærlega fyrir móttökurnar.

Á morgun koma krakkar frá USVH í heimsókn til okkar.  Ætlunin er að hrista saman liðin fyrir Unglingalandsmót.  Mæting er á Grundunum klukkan 13 og þar verður tekin fótboltaæfing.  Síðan verður farið í íþróttahúsið og farið í körfubolta.  Eftir stífar æfingar fara allir í sund og slappa af.  Áður en þau fara heim er síðan grillað og borðað saman.  Allir sem ætla á Unglingalandsmót að keppa eru hvattir til að mæta og æfa.

Nú er ljóst að við förum með 30 keppendur á Höfn eftir eina viku.  Er það fín þátttaka og er gaman að sjá hvað foreldrar eru duglegir að fara með börnin sín þrátt fyrir vegalengdir.  Nú er í fyrsta sinn keppt í mótorcrossi og mun HSS eiga tvo keppendur í því.

Nú er barnamóti HSS lokið.  Mikill vindur einkenndi mótið. En það tókst þó að mestu með ágætum.  Aðeins færri keppendur voru nú en í fyrra en skráningafjöldi var þó svipaður.  Búið er að setja úrslitin inn á fri.is undir linknum mótaforrit.  Þeir sem tóku myndir mega senda okkur myndir til að setja hér inn á.  Hægt er að senda myndir á stebbij@snerpa.is.  Vill HSS þakka starfsmönnum mótsins fyrir þeirra störf og þeim Sauðfjárseturs mönnum fyrir liðlegheit.

Nú standa yfir skráningar á Barnamót HSS sem haldið verður á Sævangsvelli miðvikudaginn 25. júlí.  Einnig stendur yfir skráning á Unglingalandsmót sem haldið verður á Höfn í Hornafirði um verslunarmannahelgina.  Hægt er að skrá sig til leiks hjá Kolbeini í síma 6923334 til þriðjudagsins 24. júlí.

Guðjón Þórólfsson sigraði í hástökki í flokki 14 ára drengja í Meistaramóti Íslands í Borgarnesi 15. júlí síðastliðinn.  Stökk Guðjón yfir 1.75 metra sem var 19 cm. hærra en drengurinn í sæti númer 2.

Héraðsmót HSS fór fram á Sævangsvelli 14. júlí 2007 í hinu venjulega Héraðsmótsveðri nema rigningarlaust.  Mótið fór vel fram í alla staði og ágætis árangur náðist.  Úrslit eru komin inn á fri.is