01.03.2012 13:44
Héraðsmót í badminton laugardaginn 10. mars
Héraðsmót HSS í badminton verður haldið í Íþróttamiðstöðinni á Hólmavík
laugardaginn 10. mars. Mótið hefst kl. 15:00. Keppt verður í tvíliðaleik í opnum flokki (ekki
skipt í kyn eða aldursflokka). Mótið er ætlað keppendum 14 ára og eldri og
þátttökugjald er kr. 500.- pr. mann. Verðlaun verða veitt fyrir efstu sætin, en
megináhersla mótsins snýst að sjálfsögðu um spilagleði og skemmtan!
Skráningarblað liggur frammi í Íþróttamiðstöðinni á Hólmavík, en einnig er
hægt að skrá sig hjá Arnari með því að senda póst í netfangið
tomstundafulltrui@strandabyggd.is.
Allir að taka þátt og vera með - því það er svo gaman!
Skrifað af Arnar Snæberg Jónsson
29.02.2012 00:04
Rósi og Sigga með frábæran árangur í HálfVasa
Strandamenn voru áfram í eldlínunni í Svíþjóð í dag, en þar fór fram hálf Vasa-ganga, 45 km. að lengd. Þau Rósmundur Númason og Sigríður Guðbjörg Jónsdóttir tóku þátt í göngunni og stóðu sig afskaplega vel. Sigríður var að ganga meira en 20 km. í fyrsta skipti og lauk keppni á 4 klukkutímum, 1 mínútu og 5 sekúndum.
Alls tóku 198 keppendur þátt í aldursflokki Sigríðar, en hún
lenti að lokum í 63. sæti - frábær árangur í fyrstu tilraun við þessa miklu
vegalengd. Rósmundur stóð sig ekki síður vel, en hann gekk á 2:58:53 sem er
besti tími sem hann hefur náð í HalvVasa til þessa. Alls luku 221 þátttakendur
keppni í aldursflokki Rósmundar, en hinn frábæri tími hans dugði honum í 16.
sæti í sínum aldursflokki sem er frábært afrek.
Auk þeirra Sigríðar og Rósmundar tók einn annar Íslendingur, Ólafur
Jóhannsson úr Garðabæ, þátt í HalvVasan og stóð sig með ágætum í aldursflokki 65-69 ára.
Við óskum Strandafólkinu okkar innilega
til hamingju með FRÁBÆRA göngu og sendum hlýja strauma til þeirra - og hvetjum
alla sem þetta lesa til að gera slíkt hið sama!
Skrifað af Arnar Snæberg Jónsson
28.02.2012 15:00
Umg. Geislinn gerir samning við Strandabyggð
Ungmennafélagið Geislinn á Hólmavík skrifaði á dögunum undir samning við sveitarfélagið Strandabyggð. Félagið hefur staðið fyrir öflugu
íþrótta- og æskulýðsstarfi á starfssvæði sínu í marga áratugi með ræktun lýðs og
lands að leiðarljósi og stendur
fyrir æfingum í hinum ýmsu íþróttagreinum allt árið. Samningurinn milli Geislans
og Strandabyggðar er til þriggja næstu ára og þar er kveðið á um rekstrarframlag
til félagsins auk endurgjaldslausra afnota af húsnæði og íþróttavöllum í eigu
sveitarfélagsins. Þá mun Umf. Geislinn taka að sér skipulagningu og framkvæmd á
hátíðahöldöm á 17. júní út samningstímabilið, en því hlutverki hefur félagið
einmitt sinnt undanfarin ár.
Undir samninginn skrifuðu Ingibjörg Valgeirsdóttir sveitarstjóri og Jóhann
Áskell Gunnarsson úr stjórn Umf. Geislans. Einnig var Arnar S. Jónsson
tómstundafulltrúi og framkvæmdastjóri HSS viðstaddur, en hann sá um samningsgerðina fyrir hönd
sveitarfélagsins. HSS óskar Umf. Geislanum til hamingju með samninginn og vonar að hann verði til að efla starf félagsins í framtíðinni.
Skrifað af Arnar Snæberg Jónsson
28.02.2012 09:29
Frábær árangur Strandamanna í UngdomsVasan
Vösk sveit frá
Skíðafélagi Strandamanna er nú stödd í Svíþjóð þar sem Vasagangan fornfræga fer
fram næsta sunnudag. Fjölmargar skíðagöngur eru haldnar í vikunni fyrir stóru
gönguna. Ein af þeim er UngdomsVasa, en hún fór fram sunnudaginn 26. febrúar.
Þar kepptu þrír ungir Strandamenn og náðu þau öll frábærum árangri. Branddís Ösp
Ragnarsdóttir keppti í flokki 13-14 ára, en sá aldurshópur gengur 7 km. göngu.
Branddís endaði í 24. sæti af 73 keppendum á tímanum 24:17. Stefán Snær
Ragnarsson, bróðir Branddísar, keppti í flokki 11-12 ára og lauk keppni í 89.
sæti af 170 keppendum á tímanum 20:51. Númi Leó Rósmundsson keppti einnig í
flokki 13-14 ára og náði aldeilis frábærum árangri, lenti í 18. sæti af 82
keppendum á tímanum 20:20.
Þess má geta að krakkarnir af Ströndum voru
einu íslensku keppendurnir í UngdomsVasa. Á vefsíðu Skíðafélags Strandamanna kemur fram að þau hafi öll verið mjög ánægð með daginn, sól og
blíða hafi leikið við þau og göngufæri afar gott.
Við óskum krökkunum og aðstandendum innilega til hamingju með þennan
frábæra árangur. Einnig sendum við hlýja strauma til Sigríðar Jónsdóttur og
Rósmundar Númasonar sem keppa í HalvVasa í dag, þriðjudaginn 28. febrúar, en það er 45 km. ganga. Úrslit
úr henni verða birt hér á síðunni um leið og þau liggja fyrir.
Skrifað af Arnar Snæberg Jónsson
17.02.2012 08:48
Skíðafélagið gerir samning við Strandabyggð
Nýlega skrifaði sveitarfélagið Strandabyggð undir styrktarsamning við hið
öfluga Skíðafélag Strandamanna. Í samningnum, sem er til þriggja ára og gildir
því út árið 2014, er kveðið á um árlegan stuðning Strandabyggðar við
Skíðafélagið ásamt endurgjaldslausum afnotum af húsnæðisaðstöðu í eigu
sveitarfélagsins undir æfingar og aðra viðburði. Skíðafélagið hefur verið
sérstaklega öflugt undanfarin ár í að efla veg og vanda skíðaíþróttarinnar á
Ströndum, einkum og sér í lagi skíðagöngu. Í þeirri grein á félagið fólk í
fremstu röð sem hefur náð góðum árangri á mótum, til dæmis á Andrésar Andar
leikunum.
Við undirskrift samningsins kom fram í máli Rósmundar Númasonar,
stjórnarmanns í Skíðafélaginu, að félagið stefnir á mikla uppbyggingu í Selárdal
á komandi árum. Þar hefur félagið haft aðsetur undanfarin ár til æfinga og
mótshalds. Þar á að reisa húsnæði til afnota fyrir iðkendur, hvort sem er við
æfingar eða mótshald. Framtíð skíðaíþróttarinnar á Ströndum er því björt.
Frétt og ljósmynd tekin af vef Strandabyggðar.
Skrifað af Arnar Snæberg Jónsson
06.02.2012 10:27
Héraðsmót í skíðagöngu tókst vel
Héraðsmót HSS í skíðagöngu fór fram í Selárdal sunnudaginn 5.
febrúar. Fyrri helmingur göngunnar var með hefðbundinni aðferð en seinni
hlutinn með frjálsri aðferð, tímataka var ekki stöðvuð meðan skipt var um skíði
og stafi, en um helmingur keppenda skipti um skíði eftir hefðbundna
hlutann. Aðstæður voru góðar í Selárdal, gamall snjór og gott rennsli í góðri
braut.
Úrslit mótsins má nálgast á vefsíðu Skíðafélagsins - smellið hér til að sjá úrslitin.
Skrifað af Arnar Snæberg Jónsson
06.02.2012 09:21
Strandamenn gera það gott á Ísafirði
Félagar úr Skíðafélagi Strandamanna gerðu góða ferð til Ísafjarðar nú á
laugardaginn, en þar var haldið Vestfjarðamót í skíðagöngu í lengri vegalengdum.
Mótið fór fór fram á Seljalandsdal í ágætu veðri, en hiti var rétt yfir
frostmarki og nægur snjór á brautinni. Brautin var 10 km. að lengd þannig að
þeir sem gengu lengri vegalengdir en það fóru hana tvisvar til þrisvar sinnum.
Þeir Birkir Stefánsson og Ragnar Bragason gerðu sér lítið fyrir og urðu í
tveimur efstu sætunum í fjölmennasta flokki og grein mótsins, 30 km. göngu karla
35-49 ára. Þeir félagar voru talsvert langt á undan næstu mönnum. Þá kepptu
mæðgurnar Sigríður Guðbjörg Jónsdóttir og Branddís Ösp Ragnarsdóttir í 20 og 10
km. göngu og náðu þar fínum árangri.
Skrifað af Arnar Snæberg Jónsson
03.02.2012 19:23
Héraðsmót í skíðagöngu næsta sunnudag
HSS heldur héraðsmót í skíðagöngu sunnudaginn 5. febrúar í Selárdal og hefst mótið kl. 14. Keppt verður í göngu þar sem fyrst er genginn 1 hringur með hefðbundinni aðferð, skipt um skíði og annar hringur genginn með frjálsri aðferð. Ekki er skylda að skipta um skíði, heldur má ganga á þeim sömu alla leið. Keppt er í öllum flokkum og vegalengdir eru þær sömu og í skíðafélagsmótum en sem dæmi ganga karlar 17 ára og eldri 5+5 km og konur 2,5+2,5 km. Verðlaun verða veitt að göngu lokinni. Mótið er öllum opið.
ATH. Fréttin hefur verið uppfærð frá því hún birtist fyrst.
Skrifað af Arnar Snæberg Jónsson
03.02.2012 15:10
Félagsmót í skíðagöngu hjá SFS
Þann 22. janúar síðastliðinn var haldið félagsmót í skíðagöngu með frjálsri aðferð hjá Skíðafélagi Strandamanna. Mótið fór fram í ágætis aðstæðum nema illa gekk
að troða brautina þar sem snjórinn var mjög blautur og þungur. Þátttaka var
ágæt, sérstaklega hjá yngri skíðaköppum sem eru fjölmargir innan Skíðafélagsins, en þar fer fram mjög öflug starfsemi fyrir yngri kynslóðina.
Úrslit mótsins má nálgast með því að smella hér.
Æfingatöflu Skíðafélagsins fyrir árið 2012 má sjá með því að smella hér.
Skrifað af Arnar Snæberg Jónsson
03.02.2012 08:31
Lífshlaupið komið í gang
Þann 1. febrúar síðastliðinn hófst Lífshlaupið svokallaða, en það er heilsu- og
hvatningarverkefni ÍSÍ fyrir alla aldurshópa. Leikurinn, sem finna má á vefnum lifshlaupid.is, hvetur landsmenn til að huga að daglegri hreyfingu og auka hana eins og kostur er
þ.e. í frítíma, heimilisverkum, vinnu, skóla og við val á ferðamáta.
Lýðheilsustöð ráðleggur börnum og unglingum að hreyfa sig í minnst 60
mínútur á dag og fullorðnum í minnst 30 mínútur á dag. Inn á vef Lífshlaupsins
er hægt að velja um þrjár leiðir til að taka þátt í Lífshlaupinu: Ef þú ert 15
ára og yngri getur þú tekið þátt í hvatningarverkefni fyrir grunnskóla. Ef þú
ert 16 ára og eldri getur þú tekið þátt í vinnustaðakeppni.
Allir geta tekið
þátt í einstaklingskeppni þar sem þátttakendur geta skráð niður sína daglegu
hreyfingu allt árið. Hægt er að fylgjast með fjölda þátttakenda, fjölda liða og
með þeim árangri sem þátttakendur ná í hverju sveitarfélagi fyrir sig með því að
smella á Staðan vinstra megin á vef Lífshlaupsins.
Við hjá HSS hvetjum sem flesta til að taka þátt í þessum stórskemmtilega leik sem eflir líkama og sál!
27.01.2012 08:40
Hadda keppti á Reykjavík International Games
Íþróttamaður síðasta árs hjá HSS, Hadda Borg Björnsdóttir, keppti fyrir HSS á Reykjavík International Games þann 21. janúar síðastliðinn. Hadda keppti að vanda í hástökki, en mótið var mjög sterkt og keppnin hörð.
Hadda náði ágætum árangri á mótinu, en hún stökk yfir 1,50 og hafnaði í fimmta sæti.
Skrifað af Arnar Snæberg Jónsson
27.01.2012 08:22
Umsóknarfrestur í Æskulýðssjóð 1. feb
Frestur til að leggja inn umsókn í Æskulýðssjóð Menntamálaráðuneytisins rennur út þann 1. febrúar nk. Við úthlutun úr Æskulýðssjóði fyrir er lögð áhersla á verkefni er miða að mannréttindafræðslu og lýðræðislegri þátttöku ungmenna í samfélaginu og samstarfsverkefni æskulýðsfélaga og æskulýðssamtaka.
Allar nánari upplýsingar um sjóðinn má nálgast með því að smella hér.
Skrifað af Arnar Snæberg Jónsson
02.01.2012 13:40
Strandamenn í sjónvarpinu
Eins og margir muna fór Landsmót 50 ára og eldri fram í fyrsta skipti á Hvammstanga síðasta vor. Strandamenn fjölmenntu á viðburðinn og náðu fínum árangri eins og sjá má með því að smella hér.
Á nýársdag var sýnd í Ríkissjónvarpinu skemmtileg heimildamynd um mótið og stemmninguna sem þar ríkti. Hægt er að horfa á myndina með því að smella hér, en í myndinni bregður að sjálfsögðu fyrir nokkrum kunnuglegum andlitum af Ströndunum og víðar.Landsmótið þótti takast afar vel, en keppendur voru á þriðja hundrað.
Landsmót 50 ára og eldri verður haldið í Mosfellsbæ helgina 8.-10. júní sumarið 2012.
Skrifað af Arnar Snæberg Jónsson
31.12.2011 11:20
Gleðilegt nýtt ár!
Héraðssamband Strandamanna óskar aðildarfélögum, iðkendum og íbúum öllum á Ströndum gleðilegs nýs árs með góðum þökkum fyrir liðnu árin.
Megi nýja árið færa með sér góð afrek, gleði og gæfu í hvívetna!
Skrifað af Arnar Snæberg Jónsson
07.12.2011 13:28
Góðir gestir á Ströndum
Afbragðs góð mæting var á námskeið í Felix, félagakerfi ÍSÍ og UMFÍ, sem haldið var á Hólmavík miðvikudaginn 16. nóvember síðastliðinn. Námskeiðið var haldið í húsnæði Hólmadrangs og þangað mættu 12 manns víðs vegar af Ströndum. Einnig komu gestir úr Reykhólahreppi á námskeiðið.
Leiðbeinandi á námskeiðinu var Rúna H. Hilmarsdóttir, umsjónarmaður Felix. Óhætt er að segja að menn hafi orðið margs vísari, en Felix-kerfið býður upp á ótal möguleika sem félögin geta nýtt sér til utanumhalds og umsýslu.
Auk Rúnu mættu þær Líney Rut Halldórsdóttir framkvæmdastjóri ÍSÍ og Halla Kjartansdóttir skrifstofustjóri einnig á Strandirnar til að heilsa upp á heimamenn.
Hólmadrangi eru færðar bestu þakkir fyrir aðstöðuna á námskeiðinu.
Skrifað af Arnar Snæberg Jónsson
Flettingar í dag: 151
Gestir í dag: 14
Flettingar í gær: 662
Gestir í gær: 119
Samtals flettingar: 183179
Samtals gestir: 21871
Tölur uppfærðar: 5.4.2025 13:34:19
